Ruta do Viño de Monterrei

O que percorra a Ruta do Viño de Monterrei descubrirá unha paisaxe distinta, un camiño bañado polas cores do viño, enriquecido pola súa historia, gastronomía e, sobre todo, pola amable hospitalidade das súas xentes.

A Ruta do Viño de Monterrei atópase nunha comarca con gran riqueza cultural, na que emerxen monumentos como o Castelo de Monterrei, a acrópole máis grande da comunidade e onde se imprimiu o primeiro incunable galego, a igrexa prerrománica de Mixós, a igrexa e claustro da Merced, a Casa dos Acevedo (que acolleu un encontro entre Felipe “el Hermoso” e o Cardenal Cisneros), a praza de José García Barbón (histórico mecenas e filántropo da vila) ou a Casa do Escudo (datada no ano 1737), entre outros.

Pese a non tratarse dunha ruta  moi extensa en territorio, acolle unha gran variedade de lugares dignos de ser visitados e recordados. A natureza é espectacular, como mostran o Parque Natural do Invernadoiro (do que a comarca de Monterrei é a súa porta de entrada), a vertente da Cidadella (Vilardevós), o Pozo do Demo (Verín) ou os manantiais de auga mineiromedicinales (Cabreiroá, Sousas , Fontenova, Caldeliñas e Fonte do Sapo), que forman parta da Ruta Termal e da Auga- Itineriario cultural Europeo. Sen esquecernos do paso polo territorio de dúas variantes do Camiño de Santiago: o camiño sudeste da Vía da Prata e o Camiño Interior Portugués.

A sucesión de vales e montañas configuran unha paisaxe única na que o viaxeiro poderá descrubrir a comarca co maior número de lagares rupestres de Galicia, coñecer a arquitectura tradicional nos seus pobos e degustar a súa enogastronomía, que ademais de viño e produtos como o bacallau ao cabrito, homenaxea coa súa torta do Cigarrón á figura do Entroido de Verín (Festa de Interese Turístico Nacional).

Todo aquel que visite Monterrei sentirá que está nunha terra diferente, con recintos amurallados, camiños centenarios, rutas de peregrinación, arquitectura popular, montes interminables, natureza agreste e, sobre todo, viño, bo viño.