Ruta do Viño do Ribeiro

A experiencia da Ruta do Viño do Ribeiro vai moito mis aló dos seus viños e permite ao turista escoller entre múltiples propostas para gozar ao máximo da súa estancia nestas terras. Comezando polas bodegas que experimentaron unha auténtica revolución, conseguindo o equilibro perfecto entre tradición e modernización, que se reflicte na súa innovadora oferta enoturística.

Na Ruta do Viño do Ribeiro, a natureza e o turismo activo cobran tamén unha especial relevancia, con rutas de sendeirismo e deportes náuticos seguindo o curso dos ríos que definiron esta particular paisaxe. No Ribeiro a cultura do viño deixounos innumerables vestixios históricos, aldeas medievais, xudarías, castros, pazos ou mosteiros, testemuñas do potencial económico do sector vitivinícola nesta comarca. Todos estes recursos enoturísticos leváronnos a identificar a Ruta do Viño do Ribeiro como O camiño do viño, co obxectivo de trasladar a idea do Ribeiro como unha zona con gran riqueza histórica, desde os romanos ata hoxe, pasando polas grandes ordes monacais, os fidalgos ou señores da terra e a figura dos arrieiros.

Non hai que esquecer, ademais, o turismo termal, auténtico motor económico do Ribeiro no século XIX e que, de novo toma impulso hoxe grazas aos modernos balnearios e termas situados nas beiras dos seus ríos.

Este territorio ofrece moitas e variadas experiencias enoturísticas e, desde a Ruta do Viño do Ribeiro, queremos convidarte a que as descubras. En parella, en familia ou en grupo, ti elixes a forma e nós ofrecemos as propostas, para todos os gustos. Paseos en Ecocatamarán, aloxamentos entre viñedos, viñoterapia, catas comentadas e todo envolto na maxia da cultura do viño.